'ஸ்கை டைவிங்': 10 ஆயிரம் அடி உயரத்தில் இருந்து குதிக்கிறார் அருண் விஜய்

'மலை மலை' பெற்ற வெற்றியின் மூலம் உற்சாகத்தில் இருக்கும் அருண் விஜய், மேலும் பல வெற்றிகளைக் குவிக்கத் தயாராகி வருகிறார். 'மலை மலை' படத்தில் பணிபுரிந்த குழுவுடன் மறுபடியும் கைகோர்த்து 'மாஞ்சா வேலு' என்ற படத்தில் நடிக்கவுள்ளார்.

'மலை மலை' படத்திற்காகத் தமிழகம் முழுவதும் உள்ள திரையரங்குகளுக்குச் சென்று அங்கு ரசிகர்களைச் சந்தித்தவரிடம். இதே படக் குழுவினர் மீண்டும் ஒரு படத்தில் இணைய வேண்டும் என்று ரசிகர்கள் கேட்டுக்கொண்டார்களாம். எனவே இக்குழுவின் அடுத்த படமானது இன்னும் அதிகமாக ரசிகர்களைத் திருப்திபடுத்த வேண்டும் என்று இதுவரை தமிழ்த் திரைப்படங்களில் யாரும் செய்யாத சாகச சண்டைக் காட்சிகளை இப்படத்தில் செய்ய அருண் விஜய் முடிவு செய்துள்ளார்.

இதற்காக 'மாஞ்சா வேலு' படத்தில் 10 ஆயிரம் அடி உயரத்தில் இருந்து குதிப்பது போன்ற ஒரு காட்சியை அமைத்திருக்கின்றனர். இந்திய திரைப்பட உலகில் எந்த நடிகரும் நடித்திராத இந்தக் காட்சியில் நடிப்பதற்காக 'ஸ்கை டைவிங்' பயிற்சி பெற அருண் விஜய் லண்டன் சென்றுள்ளார். அங்கு 15 நாட்கள் பயிற்சி பெற்று சென்னைக்குத் திரும்பும் அருண் விஜய். 2009, செப்டம்பர் 19ஆம் தேதியன்று தொடங்கவிருக்கும் 'மாஞ்சா வேலு' படத்தில் நடிக்கவுள்ளார்.